Жума куни кечқурун юз берган авиаҳалокат ортидан Украинанинг Харьков вилоятида мотам эълон қилинди. 

Ан-26 ҳарбий-транспорт самолёти ўқув парвози пайтида Чугуев шаҳри яқинида қулаб тушган, оқибатда 25 киши ҳалок бўлган. Икки киши тирик қолди, бироқ улардан бирининг аҳволи оғирлиги, танасининг 90 фоизи куйиб кетгани айтилмоқда. «Евроньюс» хабарига кўра, ҳодиса юзасидан «Парвоз қоидаларини бузиш» моддаси бўйича иш қўзғатилган.  

Қидирув-қутқарув ишлари кечаси билан олиб борилди ва бугун эрталаб тўхтатилди. Аввалроқ самолёт бортида 28 киши бўлгани айтилган эди, бироқ кейинроқ курсантлардан бири парвозга қўйилмагани маълум бўлди.  

Украина Мудофаа вазири ҳалокат қандайдир техник носозлик туфайли рўй берганини, аниқ сабаби «қора қути» текширилгандан кейин ошкор этилишини билдирди. 

Маҳаллий ОАВнинг ёзишича, ҳалокатга учраган самолёт 1977 йилда ишлаб чиқарилган эди.