Украина Москвага дронлар билан ҳужум қилганидан сўнг Чеченистон раҳбари Рамзан Қодиров Россияда ҳарбий ҳолат жорий этилиши кераклигини айтган.
Унинг сўзларига кўра, Киев расмийлари “террорчилик усулларини қўллаётганига шубҳа қолдирмайдиган тобора кўпроқ қарорлар қабул қилмоқда”. "Россияда ҳарбий ҳолат эълон қилиш керак, бунинг учун мўлжалланган барча жанговар ресурслардан фойдаланиб, бир вақтнинг ўзида "Украина ҳарбийлари" иборасини ишлатмасдан, бутун террорчи ячейкани йўқ қилиш керак. Украинада ҳарбийлар ва сиёсатчилар йўқ – фақат террорчилар”, — деган Қодиров.
"Бундай ҳужумга уринишларга жавоб чоралари қаттиқ бўлмаслиги керак - улар шафқатсиз бўлиши керак", деган “Путиннинг содиқ аскари” Қодиров.
У, шунингдек, Москванинг ҳужумга уруш зонасида тезкорлик билан жавоб беришини, "қасос сўзининг маъноси нима эканлигини" кўрсатишга ваъда берди ва Европа давлатларини "кимга ҳомийлик қилишлари" ҳақида ўйлашга чақирди. “Россия Германия ёки Полша эшигини тақиллатганда уларда жавоб берадиган ҳеч нарса бўлмайди - барча қуроллар Украинага сарфланган бўлади", дея қўшимча қилган Қодиров.
Ҳарбий ҳолат фақат мамлакатга ташқи таҳдид ёки тажовуз мавжуд бўлганда жорий этилади. Замонавий Россияда бу ҳеч қачон эълон қилинмаган. Қонунга кўра, тажовуз деганда чет эл қўшинларининг бостириб кириши ёки ҳужум қилиши, қуролли гуруҳларнинг кириб келиши, портлар ёки қирғоқларнинг блокадаси, бошқа давлатнинг ўз ҳудудидан ҳужум қилиш учун фойдаланишига рухсат бериши тушунилади.
Ҳарбий ҳолат Россия Президентининг фармони билан киритилади, 48 соат ичида ҳужжат Федерация Кенгаши томонидан тасдиқланиши керак. Режим бутун мамлакат бўйлаб ёки алоҳида ҳудудларда ўрнатилиши мумкин. Ҳозирда у Украинанинг аннексия қилинган тўрт ҳудудида: Донецк, Луганск, Запорожье ва Херсон вилоятларида эълон қилинган.
30 май куни дрон ҳужуми натижасида Москвадаги бир нечта турар-жой бинолари зарар кўрган. Шунингдек, нишон остида Владимир Путиннинг Ново-Огарёводаги қароргоҳи ва унга яқин одамларнинг Рублёвкада жойлашган элита уйлари бор эди. Мудофаа вазирлиги рейдни “террор ҳужуми” деб атади. Тергов қўмитаси ҳужум юзасидан жиноий иш қўзғатди.
Путиннинг ўзи Москвага ҳужумни “қўрқитувчи тактика” деб атади, чунки у “тинч объектлар”га қаратилган эди. Президент бунда “террорчилик ҳаракати аломатларини” кўрди ва бу йўл билан Украина гўёки “Россиядан жавоб қайтаришга” уринаётганини айтди. “Улар бизни ҳаракатларимизни акс эттиришга ундайди. Келинг, нима қилишни ўйлаб кўрайлик”, деган Путин.
