«Вагнер» ХҲК асосчиси, “Путиннинг ошпази” лақаби билан танилган  Евгений Пригожин Украинага қарши ҳужум пайтида Россия томонидан босиб олинган ҳудудларнинг бир қисмини йўқотишини башорат қилди ва бунинг олдини олиш учун унга 200 минг аскар ажратишни сўради. Унинг сўзларини The Moscow Times нашри келтирмоқда.

«Вагнер» ХҲК бугунги кунда самолётлар, вертолётлар, танклар, артиллерия ва бошқа зарур нарсаларга эга бўлган, бирор нарса қилишга қодир ягона тўлақонли армия тузилмаси. Менга 200 минг одам керак, Луганск-Донецк фронтидаги 200 мингдан кам одам бардош бера олмайди. Биз тўлиқ жавобгарликни ўз зиммамизга олишга тайёрмиз”, — деган Пригожин ва ягона муаммо қўшинларни қурол-яроғ ва ўқ-дорилар билан таъминлаш эканини қўшимча қилган.

«Вагнер» ХҲК раҳбари президент Владимир Путинни Украина Қуролли Кучларига қарши курашиш учун жангчиларни ёллаш учун умумий сафарбарлик эълон қилишга чақирди. Шу билан бирга, унинг таъкидлашича, уларни тайёрлаш камида уч ой керак экан.

У зудлик билан ҳаракат қилиш кераклигини таъкидлаб, чунки Украина Қуролли кучлари "мудофаа чизиғини аллақачон ёриб ўтган"ини айтган.

Пригожин яна бир бор Мудофаа вазирлигини танқид қилган ва унинг раҳбарияти вазиятнинг жиддийлигини тушунмаётганини ҳамда уни тузатишга қодир эмаслигини иддао қилган. “...Энди биз жиддий йўқотишларга дучор бўламиз, бунга аминман. Биз, албатта, ҳудудларнинг бир қисмини йўқотамиз ", - деб огоҳлантиради Пригожин.

Унинг сўзларига кўра, Бахмут шимолидаги Раздоловка яқинидаги позициялар аллақачон бой берилган ва Запорожье йўналишида содир бўлаётган воқеаларни умуман "фалокат" сифатида тавсифлаш мумкин.

Пригожин ва унинг ҳарбий компанияси Украина билан урушда улкан йўқотишларга дуч келмоқда. Фақат Бахмут шаҳри учун жангларда унинг ўзининг сўзларига кўра 20 минг “вагнерчи” қурбон бўлган. Бунга ярадорларни ҳам қўшсак, талафотлар сони 100 мингдан ошиб кетади.