Афғонистоннинг ғарбий Ғур вилоятидаги машҳур Жом минораси вайронага айланиш арафасида. Бу ҳақда вилоят волийлиги маълум қилди, дея хабар бермоқда TOLOnews.

Минора тоғлар орасида, Жамруд ирмоғи Ҳарируд дарёсига қуйилган жойда, Жом қишлоғи ҳудудида жойлашган бўлиб, 2002 йилда ЮНЕСКОнинг бутунжаҳон мероси рўйхатига киритилган. 

“Агар эътибор қаратилмаса, тез орада миноранинг бузилиб кетишига гувоҳ бўламиз, бу эса шармандалик. ЮНЕСКО масъуллари бу масалага эътибор қаратиши зарур”, – деди Ғур вилояти Ахборот ва маданият департаменти раҳбари Абдул Ҳай. 

Таъкидланишича, охирги йигирма йил давомида минора мутлақо қаровсиз қолган. Қиш ойларида бузилиб кетиши мумкинлигидан хавотир билдириляпти. 

Ўйма безаклари билан машҳур 65 метрлик Жом минораси 1194 йилда ғурийлар сулоласи даврида барпо этилган. У Фирузкўҳ шаҳридан қолган ягона иншоот деб тахмин қилинади. Фирузкўҳни 1221 йилда Чингизхон қўшинлари босиб олган ва вайрон қилган.