Покистон экстремизм ва терроризмга қарши янада самарали курашиш учун Афғонистон “Толибон” ҳаракати билан ҳамкорликни кенгайтириш тарафдори.

Бу ҳақда Покистон армияси қуруқликдаги қўшинлари қўмондони генерал Асим Мунир амалдаги «Толибон» муваққат ҳукумати ташқи ишлар вазири вазифасини бажарувчи Амирхон Муттақий билан Равалпиндида бўлган  учрашувда маълум қилди, дея хабар бермоқда Покистон матбуоти.

Учрашувда томонларни қизиқтирган масалалар, жумладан, минтақавий хавфсизлик, чегараларни бошқариш ва мавжуд хавфсизлик муҳитини яхшилаш учун икки томонлама хавфсизлик механизмларини шакллантириш масалалари муҳокама қилинди.

Мунир Покистон барқарор, тинч ва фаровон Афғонистонга содиқлигини яна бир бор тасдиқлади.

Муттақий, ўз навбатида, Покистоннинг Афғонистон халқини анъанавий қўллаб-қувватлашидан мамнунлигини билдирди. У Исломободнинг Афғонистонда тинчлик ва тараққиёт ўрнатишдаги ролига эътибор қаратди.

Муттақий, шунингдек, “Толибон”нинг минтақавий хавфсизлик ва фаровонликни ошириш учун Покистон билан яқиндан ҳамкорлик қилиш истагига ишора қилди.

Томонлар икки томонлама муносабатларни мустаҳкамлаш ва умумий муаммоларни ҳал этиш учун мунтазам алоқалар муҳимлигини таъкидладилар.