Украина президенти Владимир Зеленский Европадан ўз мамлакатига самолёт ва оғир қуролларни имкон қадар тезроқ етказиб беришни талаб қилди.

Лондонга ташрифи ортидан Парижга келган Зеленский Елисей саройида Франция президенти Эммануэл Макрон ва Германия канцлери Олаф Шольц билан биргаликда матбуот баёноти берди.

Зеленский Парижга келганидан хурсанд экани ва унинг ташрифи Европа қитъаси бирлигини мустаҳкамлашга ёрдам беришини билдирди.

Франция ва Германия Украинага қурол етказиб бераётганини эслатган Зеленский, мамлакатининг қуролга бўлган эҳтиёжи ҳали тугамаганини айтди.

Европани ўз мамлакатига самолётлар ва оғир қуролларни имкон қадар тезроқ етказиб беришга чақирган Зеленский: “Украина қанчалик тезроқ узоқ масофага учувчи оғир қуролларга эга бўлса, учувчиларимиз самолётларни қанчалик тез қабул қилса, Россия агрессияси шунчалик тез тугайди ва мамлакатда тинчлик ўрнатилади”, дея нутқ сўзлади.

Макрон Зеленскийни Франция ва Европанинг қурол жўнатиш бўйича иродаси сақланиб қолишига ишонтирди. “Украина тинчликка эришиш учун бизга бемалол ишониши мумкин”, деди мамлакат президенти.

Ўз навбатида, канцлер Шольц ҳам украиналикларнинг жасурлиги, қаҳрамонлиги ва қатъиятли эканини таъкидлади.

Украинага бўлган содиқликларида қатъий эканликларини билдирган Шольц, ўз мамлакатининг Украинага молиявий ва гуманитар ёрдам билан бирга қурол-яроғ, оғир артиллерия, ҳаво мудофаа тизимлари ва жанговар танклар билан таъминлаганини эслатди.

Шольц Германия Украинага қурол-яроғ етказиш бўйича ёрдамини давом эттиришини қўшимча қилди.