Россия Украинанинг Бахмут шаҳрини эгаллашга уриниб, уни бутунлай вайрон қилди. Бу ҳақда Украина президенти Владимир Зеленский Хиросимадаги G7 саммитида сўзлаган нутқида айтиб ўтди.

Журналистлар Зеленскийга Бахмутнинг ҳолати ва шаҳарнинг Россия томонидан босиб олиниши ҳақида савол беришди. Бунга жавобан Зеленский шундай деди: “Менимча, йўқ, лекин у ерда ҳеч нарса қолмаганини англашингиз керак. Улар ҳамма нарсани йўқ қилишди. У ерда битта ҳам бутун бино йўқ. Бу жуда катта фожиа, лекин Бахмут бугун фақат бизнинг қалбимизда яшайди”.

Бир қатор оммавий ахборот воситалари Украина президентининг сўзларини шаҳарнинг йўқотилганини тан олиш сифатида талқин қилишди. Украина президентининг матбуот котиби Сергей Никифоровнинг аниқлик киритишича, “Менимча, йўқ” ибораси шаҳарнинг Россия армияси томонидан босиб олиниши масаласига ишора қилади.

“Украина президентининг Бахмут ҳақидаги саволларга берган жавобларига келсак. Мухбирнинг саволи: “Руслар Бахмутни олдик дейишди”. Президентнинг жавоби: "Мен бундай деб ўйламайман". Шундай қилиб, президент Бахмутнинг қўлга олинганини рад этди ", деди Никифоров.

FT мухбири Кристофер Миллер Зеленскийнинг жавоблари видеосини жойлаштирди ва президент жамоаси Россия томонидан шаҳар устидан назоратни тасдиқламаслигини айтган. Киев Украина бир неча ойдан бери ушлаб турган сўнгги кварталлар устидан назоратни қўлдан бой бермаганини таъкидламоқда. Бироқ, Зеленский шаҳар бутунлай вайрон бўлганини назарда тутиб йўқолган деган.

Аввалроқ Россия Мудофаа вазирлиги ўз қўшинлари “Вагнер” гуруҳи ёлланма аскарлари билан биргаликда Бахмут шаҳрини назоратга олгани ҳақида хабар берган эди.

Украинанинг Донецк вилоятида жойлашган Бахмут кўп ойлардан бери Украина ва Россия қўшинлари ўртасидаги шиддатли жанглар майдонига айланган. Россия 2022 йилнинг кузида аннексия қилганини эълон қилган минтақанинг қарийб ярмини назорат қилади.