Венгрия Миллий Ассамблеяси Швеция ва Финляндиянинг НАТОга аъзолигини ратификация қилиш бўйича овоз беришни яна бир бор ортга сурди.

Associated Press агентлигининг парламент қарорига таяниб хабар беришича, овоз бериш 20 мартдан кечиктирмай бўлиб ўтиши керак.

Шу пайтгача парламент йиғилишлари кун тартибида Скандинавия давлатларининг алянсга кириши бўйича овоз бериш 6-9 март кунлари бўлиб ўтиши кўрсатилган эди. Энди парламентнинг 20 март куни бошланадиган мажлисида қандай овоз бериши кутиладиган бўлди.

Шу билан бирга, 2022 йил декабрь ойида Венгрия ратификация масаласини 20 февралдан кечиктирмай кўриб чиқишларини эълон қилган эди.

НАТОга аъзо давлатлар 2022 йил 5 июлда Финляндия ва Швециянинг Шимолий Атлантика Кенгашига қўшилиш протоколларини имзолаган эдилар. Бу давлатлар НАТОга аъзо бўлган барча давлатлар қўшилиш протоколларини ратификация қилгандан сўнггина НАТОга қўшилади.

Ҳозиргача НАТОнинг 30 та аъзосидан фақат Туркия ва Венгрия давлатлари Швеция ва Финляндиянинг алянсга аъзолигини ратификация қилмаган.

Туркия иккала шимолий давлатдан курд ташкилотларини террорчи, деб эълон қилишни ва терроризмда айбланган шахсларни экстрадиция қилишни талаб қилмоқда. Анқаранинг яна бир шарти, қурол-яроғ етказиб беришга қўйилган тақиқлар бекор қилиниши керак.