29 июл куни Тошкентда Ўзбекистон Республикаси ва Қозоғистон Республикаси ўртасида дипломатик муносабатлар ўрнатилганининг 30 йиллигини кенг нишонлаш бўйича Қўшма ҳаракатлар режасини имзолаш маросими бўлиб ўтди.
Режа Ўзбекистон-Қозоғистон дипломатик муносабатларини ўрнатишга бағишланган қатор тадбирларни ташкил этишни мақсад қилади, деб хабар берди Ўзбекистон Республикаси Ташқи ишлар вазирлиги матбуот хизмати.
Ҳужжат Ўзбекистон Республикаси Ташқи ишлар вазири Владимир Норов ва Қозоғистон Республикаси Бош вазири ўринбосари, ташқи ишлар вазири Мухтор Тлеуберди томонидан имзоланди.
Маросим Шанхай ҳамкорлик ташкилотига аъзо давлатлар кенгашининг Тошкентдаги йиғилиши доирасида бўлиб ўтди.
Ўзбекистон Республикаси билан Қозоғистон Республикаси ўртасида дипломатик муносабатлар 1992-йил 23-ноябрда ўрнатилган.
