Депутат Расул Кушербаев ўқитувчи ва тарбиячиларни тезроқ бепул тиббий кўрикдан ўтишга чақирди.

«Ўқитувчи ва тарбиячиларни бепул тиббий кўрикдан ўтказиш бўйича топшириқ берилди», — деб ёзади у ўзининг телеграм каналида. 

Маълумки, Ўзбекистон қонунчилигига кўра, ушбу тизим ходимлари учун мажбурий тиббий кўрикдан ўтиш бепул. Лекин турли сабаблар билан қонун талаби бажарилмай, ходимлар ўз ҳисобидан тиббий кўрикдан ўтиб келган.

Ушбу масала юзасидан Расул Кушербаев Соғлиқни сақлаш вазирининг биринчи ўринбосари Амрилло Иноятов билан мулоқотда бўлган.

Мулоқотда ССВнинг биринчи ўринбосари вилоятлардаги Соғлиқни сақлаш бошқармалари ва тиббий марказларга Халқ таълими ҳамда Мактабгача таълим тизимида фаолият кўрсатаётган ўқитувчи ва тарбиячиларни бепул тиббий кўрикдан ўтказиш бўйича топшириқлар берилганини билдирди.

«Ниҳоят қонунда кафолатланган ҳуқуқнинг амалда ҳам таъминланишига эришилаётгани бизни ҳурсанд қилмоқда. Ҳар қалай ҳаракатларимиз зое кетмабди», — дейди Кушербаев. 

Депутат, шунингдек, ўқитувчи ва тарбиячиларни тезроқ бепул тиббий кўрикдан ўтишга чақирмоқда.