“Толибон” ҳаракати август ойида афғонистонлик учувчилар томонидан олиб кетилган бир нечта самолёт ва вертолётларни қўшни давлатлардан қайтаришга муваффақ бўлди. 

Бу ҳақда Афғонистон шимолидаги Балх вилоятидаги “Толибон” қўшинлари қўмондони Аттауллоҳ Умарий маълум қилди, дея хабар беради TOLOnews.

Умарийнинг сўзларига кўра, номи ошкор этилмаган давлат билан келишилган ҳолда бир неча самолёт аллақачон Афғонистонга олиб келинган.

Балхдаги “Толибон” ҳарбий-ҳаво кучлари қўмондони Зиёул Ҳақ Осимнинг айтишича, унинг қўл остидагилар битта самолётни таъмирлаб, хизматга қайтаришга муваффақ бўлган. "Самолёт бузилган ва Дубайга таъмирлаш учун юборилиши керак эди. Лекин муҳандисларимиз ва техник ходимларимиз уни таъмирлашди", – деди у.

“Толибон” ҳаракати яна бир бор афғонистонлик учувчиларни ватанига қайтишга ундаб, улар учун ҳеч қандай таҳдид йўқлигини маълум қилди.