Афғонистоннинг Хитойдаги элчиси Жовид Аҳмад Қаюм ўз ихтиёри билан истеъфога чиқди. Тегишли баёнотни у Твиттердаги саҳифасида эълон қилди.

Баёнотда айтилишича, эндиликда дипломатик миссияга илгари «Толибон»нинг Қатардаги сиёсий офисида ишлаган Саййид Муҳиддин Садат бошчилик қилади. Хитой «Толибон» ҳукуматини расман тан олмагани учун Садат элчихонанинг биринчи котиби вазифасида ишлайди.

Айни пайтда Афғонистоннинг Покистондаги дипломатик миссиясига ҳам «Толибон» вакили – Сардор Аҳмад Шакиб раҳбарлик қилмоқда. Унинг лавозими расман “элчихона ишларини бошқарувчи” деб аталади, бироқ сўнгги бир неча кун ичида у хорижий дипломатлар, жумладан, Хитойнинг Исломободдаги элчиси билан учрашувлар ўтказди.

Ўтган йилнинг декабрь ойида Россия президентининг Афғонистон бўйича махсус вакили Замир Кабулов «Толибон» ҳукуматини де-факто тан олиш аллақачон амалга ошаётганини айтган эди.