Бугун Олий Мажлис Сенати ялпи мажлиси бўлиб ўтди. Унда Соғлиқни сақлаш вазири Б. Мусаев ҳам иштирок этиб, ижтимоий тармоқларда муҳокамаларга сабаб бўлаётган соғлиқни сақлаш тизимидаги молиявий хато-камчиликлар ҳақидаги маълумотлар юзасидан Коррупцияга қарши курашиш агентлиги директори А. Бурҳоновга ўз эътирозларини билдирди.

Хусусан, вазир бу ҳисобот молиявий назорат органларининг маълумотлари асосида тайёрланганини таъкидлаб, “агар тизимда шундай коррупцион ҳолатлар бўлган бўлса, нега бирорта каттароқ тиббиёт тизимининг раҳбари ёки бошқа мансабдорга нисбатан суд томонидан қатъий чора кўрилмади?”, деган саволни ўртага ташлади.

Бундай ҳисоботни юқори даражага олиб чиқишдан аввал вазирлик билан бирма-бир кўриб чиқиш, ана ундан кейин якуний маълумотни кенг жамоатчиликка тақдим этиш тўғри эканини қайд этди.

Боиси бугун тиббиёт тизимида 500 минг нафардан ортиқ фидойи ходим меҳнат қилаётгани, уларнинг оғир ва машаққатли меҳнатини қадрлаш кераклигини айтди.