Швеция полицияси чоршанба куни Стокголм масжиди олдида кичик намойиш ўтказишга рухсат берди, ташкилотчилар “Қуръонни йиртиб, ёқиб юборишларини” айтишди, бу эса Швециянинг НАТОга киришини янада мураккаблаштириши мумкин, деб хабар беради Reuters.
Швецияда Исломга қарши ва курдлар ҳуқуқлари учун бир қатор норозилик намойишлари Швециянинг Шимолий Атлантика Шартномаси Ташкилотига қўшилиши учун розилиги керак бўлган Туркия билан кескинликни кучайтирди.
Швеция полицияси Қуръонга қарши намойишлар бўйича сўнгги бир неча даъволарни рад этган бўлса-да, мамлакат судлари бу қарорларни ҳимояланган сўз эркинлигини бузган деб, бекор қилган.
Стокголм полицияси маълумотига кўра, намойишда бор-йўғи икки киши иштирок этиши керак эди, улар орасида ташкилотчи Салван Момика ҳам яқинда газетага берган интервюсида ўзини Қуръонга тақиқ қўймоқчи бўлган ироқлик қочқин деб таърифлаган.
Салван Момика овоз кучайтиргичда Исломга қарши гаплар айтиб Стокголмдаги масжид ёнида Мусҳафга ўт қўйган, унинг устига чўчқа гўштини қўйиб оёқости қила бошлаган.
Унга ҳамроҳлик қилаётган яна бир номаълум шахс мегафон орқали оломонга мурожаат қилган.
Бу манзара Қурбон ҳайитини нишонлаётган мусулмон жамоатчилигини ҳайратда қолдириши ва ғазаблантириши керак эди. Бунинг ўрнига, бу намойиш мусулмонлар томонидан эътибор берилмади.
Мусулмонлар унинг бу ҳаракати Исломнинг "шафқатсиз" эканлигини кўрсатиш учун қилинаётган провокация эканлигини айтиб, ўзларини осойишта тутишди. Салван Момикани тош билан урмоқчи бўлган ўсмирни полиция ходимлари тўхтатиб қолишган.
Масжид имоми Маҳмуд Халфий мусулмонларнинг байрами куни исломофобга намойиш учун рухсат берилгани ўта нотўғри бўлганини таъкидлаган.
Даниянинг ўта ўнгчи “Қаттиқ чизиқ” сиёсий партияси раҳбари Расмус Палудан Туркиянинг Стокголмдаги элчихонаси олдида Қуръон нусхасини ёқиб юборгани учун Туркия январ ойи охирида Швеция билан НАТО аъзолиги бўйича музокараларни тўхтатган эди.
Палудан чоршанба кунги намойишда иштирок этиши кутилмаган.
Бир қанча араб давлатлари, жумладан Саудия Арабистони, Иордания ва Қувайт ҳам январ ойида Қуръон ёқиб юборилганини қоралади.
Швеция Бош вазири Улф Кристерссон аввалроқ унинг мамлакати келаси ой Вилнюсдаги саммитдан олдин ёки НАТОга аъзо бўлишни хоҳлашини айтганди, аммо у вақтгача бунга эриша олишига ишончи комил эмас.
