Шотландия тарихида илк бор 37 ёшли мусулмон Ҳамза Юсуф етакчи Шотландия Миллий партиясини бошқаради. У ҳозир Шотландия Миллий партияси етакчилиги учун курашда ғолиб чиқди ва ҳозир парламент тасдиғини кутмоқда.
Маълумки, Юсуф сайловчиларнинг ярмидан сал кўпроқ овозини қўлга киритган ва унинг сиёсий платформаси Шотландияни инқироздан олиб чиқиш, яшаш харажатларини камайтириш ва Европа Иттифоқи билан бирлашишга эришиш ваъдаларига асосланган.
Унинг сайловолди дастурида алоҳида йўналиш мамлакатда қайта тикланадиган электр энергияси манбаларини қуришдир. Шунингдек, бўлажак бош вазир Шотландияни Британия монархиясидан чиқариб олиш тарафдори.
Отаси Покистондан Шотландияга келган, онаси эса кениялик бўлган Ҳамза Юсуф ҳукмрон Шотландия Миллий партиясининг энг инклюзив ва либерал арбоби саналади.
Шотландиядаги 5 миллион аҳолининг катта қисми насронийлар ва атеистлардир; мусулмонлар, яҳудийлар ва буддистларнинг умумий улуши жами аҳолининг 2,5% ни ташкил қилади.
Ўзидан олдинги Никола Стержен ҳукуматида Юсуф яқинда соғлиқни сақлаш вазири, ундан олдин эса адлия вазири бўлиб ишлаган.
У 1960 йилларда Клайдбанкдаги Singer тикув машинаси заводида ишлаган панжоблик муҳожирнинг набираси, отаси Глазго жанубида яхши ҳисобчи ва SNP фаоли бўлиб, ўғлини шаҳардаги хусусий Hutchesons’ Grammar мактабида ўқитган. Ундан икки йил илгари шу мактабда яна бир асли осиёлик сиёсатчи - Шотландия лейбористлар партияси раҳбари Анас Сарвар ҳам ўқиган.
Юсуф фаолияти давомида ирқий ҳақоратларга дуч келган, шунингдек, унинг мусулмон динига эътиқод қилиши – Юсуф Рамазон ойида рўза тутади ва масжидларга боради – бир қатор келишмовчиликлар келтириб чиқарган. У 2014 йилда бир жинсли никоҳ бўйича якуний овоз беришда қатнашмагани ҳам рақибларининг норозилигига сабаб бўлган эди.
