Ижтимоий тармоқларда пойтахтимиздаги йўловчи ташувчи автобуслардан бирининг ёнаётганлиги акс этган видео тарқалди. Мазкур ҳолатга Тошкент шаҳар Ички ишлар бош бошқармаси матбуот хизмати муносабат билдирди.
Маълум қилинишича, ИИББга бугун, 14 декабръ куни тахминан соат 15:20 ларда Сергели тумани Дўстлик чорраҳасида йўловчи ташиш автобуси ёнаётганлиги ҳақида хабар келиб тушган. Воқеа жойига етиб борган ФВВ ўт ўчириш бригадаси томонидан давлат рақами 01 142 ФCА бўлган "Мерседес Бенц" русумли йўловчи ташиш автомобилида содир бўлган ёнғин соат 15:35 ларда бартараф этилган.
«Ёнғин натижасида жароҳат олганлар йўқ. Дастлабки маълумотга кўра, ёнғин электр симларининг қисқа туташуви сабабли содир бўлган. Ҳозирда мазкур ҳолат юзасидан текширув ўтказилмоқда», – дейилади ИИББ хабарида.
