Саудия Арабистонининг Теҳрондаги элчихонаси бу йил 28 июнга тўғри келадиган Қурбон ҳайити байрамидан сўнг ишини тиклайди. Ал-Арабия телеканали хабарига кўра, Теҳронда Саудия Арабистони ташқи ишлар вазири шаҳзода Файсал бин Фархон Ол Сауд ва унинг эронлик ҳамкасби Ҳусайн Амир Абдуллоҳиён ўртасидаги учрашувда мазкур келишувга эришилган.
Эсингизда бўлса, Шаҳзода Файсал 17 июн куни расмий ташриф билан Теҳронга келган ва у ерда Абдуллоҳиён билан музокаралар ўтказганди. Шунингдек, Эрон президенти Иброҳим Раиси билан учрашганди. Дастлаб, элчихонасининг расмий очилиш маросими вазирнинг ташрифи чоғида бўлиб ўтиши тахмин қилинганди.
Теҳрон ва Риёд 10 март куни дипломатик муносабатларни тиклаш ва икки ой ичида элчихоналар фаолиятини тиклашга келишиб олди.
Мамлакатлар ўртасидаги муносабатлар 2015 йилнинг март ойида Саудия Арабистони бошчилигидаги коалициянинг Яманда “Ансоруллоҳ” ҳаракати (Хусийлар)га қарши ҳарбий амалиёт бошлаши билан кескинлашган. 2016 йилнинг январида Саудия Арабистонининг Теҳрондаги элчихонаси ва унинг Машҳаддаги консуллигига Риёдда воиз шайх Нимрнинг қатл этилишидан ғазабланган намойишчилар томонидан уюштирилган ҳужумлардан сўнг, қироллик Эрон билан дипломатик алоқаларини узган эди.
