Россия ОАВлари тарқатган хабарларга кўра, в Санкт-Петербург шаҳри марказидаги “Street Food Bar №1" қаҳвахонасида портлаш содир бўлган. Натижада “ҳарбий мухбир”, Россиянинг Украинага босқинининг ашаддий тарафдори бўлган Z-блогер Владлен Татарский (асил исми – Максим Фомин) ҳалок бўлган.
Портлаш юз берган қаҳвахона “Вагнер” ХҲК раҳбари Евгений Пригожинга тегишли экани айтилмоқда. Бу ерда “Кибер фронт Z” ҳаракати томонидан уюштирилган тадбирда Фоминга гипсдан ясалган кичик ҳайкалча совға қилинган. Дастлабки тергов материалларига кўра, ҳайкалчага портловчи модда ва зарарловчи парчалар жойланган бўлган.
Қотиллик бўйича Россия Тергов қўмитаси жиноят иши очган. Норасмий маълумотларга кўра, ҳайкалчани Татарскийга топширган санкт-петербурглик қиз, 1997 йилда туғилган фуқаро қидирилмоқда. У бир йил аввал урушга қарши митингларда қатнашгани учун қўлга олиниб, 10 сутка қамоқ жазосига ҳукм қилинган эди.
Айни пайтда "Интерфакс" манбасининг хабар беришича, Татарскийни ўлдиришда гумонланиб, Дарья Трепова қўлга олинган. Агентлик маълумотларига кўра, терговчиларнинг айтишича, гумонланувчи портловчи модда тўлдирилган ҳайкалчани блогерга топшириш учун учрашувга келган бўлиши мумкин. Бироқ бу маълумот расман тасдиқлангани йўқ. “Север. Реалии” телеграм-каналарининг ёзишича, гумонланувчи ҳали ушланмаган. У яшайдиган хонадонда тинтув ўтказилиб, онаси ва ўгай отаси ушлаб кетилган холос.
“Интерфакс”нинг ёзишича, Татарский билан ўтказилган “ижодий оқшом”даги портлаш натижасида 32 киши жабрланган, 24 нафари шифохонага ётқизилган, жумладан 6 нафарининг аҳволи жуда оғир, дея хабар бермоқда Россия ССВ.
Сиёсатшунос Константин Долговнинг айтишича, қаҳвахонадаги учрашувга Евгений Пригожиннинг ҳам келиш эҳтимоли бўлган.
Россиядаги айрим Telegram каналлари бу портлашдан мақсад бошқа эканлигини тахмин қилмоқда. Жумладан, охирги пайтларда Татарский Украинага қарши “махсус операция”нинг кўнгилдагидек кечмаётганидан ёзғириб, амалдаги ҳарбий раҳбариятни танқид қилиб материаллар жойлаган. Бу портлаш ўзгараётган сиёсий вазиятга мослаша олмасдан пропаганда ва дезинформацияни эплолмай қолган блогерни йўқ қилиши учун уюштирилиб, айб Украина махсус хизматларида тўнкалади ва натижада “бир ўқ билан икки қуён урилади”, дейишмоқда айрим блогерлар.
Бошқа бир тахминларга кўра Татарскийнинг ҳарбий ҳаракатларда қатнашган пайтидаги қилмишлари учун "ўтмишдан салом" қабилидаги қасос ҳаракати бўлиши ҳам мумкин.
Қайд этиш жоиз, ҳалок бўлган блогер нафақат украинлар ва урушга қарши фаолларни ҳақоратловчи чиқишлари, балки мусулмонларга қарши баёнотлари билан ҳам машҳур. Жумладан, у насронийлар яшайдиган ерларда мусулмон масжидлари қурилишини қоралаб чиққан.
Москвадаги Святое озеро яқинида қурилиши режалаштирилган масжидга қарши намойишни ёқлаб постлар жойлаган.
Уруш тарғиботчиси бўлмиш Татарский Кремлдаги тантанали мажлисдан қилган охирги видеоэфирларидан бирини “Биз ҳаммани енгамиз, бу йўлда керак бўлса ҳаммани ўлдирамиз, ҳаммани талаймиз, ҳаммаси биз истагандек бўлади” дея якунлаганди. Ҳақиқий якун эса у орзу қилганидан бошқачароқ бўлиб чиқди.
Абулфайз Сайидасқаров тайёрлади.
