Россия Ташқи ишлар вазирлиги АҚШ Давлат котиби Энтони Блинкеннинг Россия ҳарбийларининг Қозоғистонга юборилиши ҳақидаги сўзларини «сурбетлик» деб атади.

Блинкен Коллектив Хавфсизлик Шартномаси Ташкилоти миссияси доирасида Қозоғистонга ҳарбий хизматчилар жўнатилишига изоҳ берар экан, шундай деди: «Яқин тарихдан олинадиган сабоқ шуки, уйингизга руслар бир марта келса, уларнинг кетиши қийин бўлиши мумкин».

Россия Ташқи ишлар вазирлиги эса бунга жавобан Энтони Блинкен биринчи навбатда ўз мамлакати тарихига мурожаат қилиши кераклигини айтди. 

«Агар Блинкен тарих сабоқларини жуда яхши кўрса, у қуйидагиларни билиши керак: агар сизнинг уйингизда америкаликлар бўлса, омон қолиш, ўғирланмаслик ёки зўрланмаслик қийин бўлиши мумкин», – дейилади вазирлик баёнотида.

Россия томонининг таъкидлашича, «бизга буни яқин ўтмиш эмас, балки бутун 300 йиллик Америка давлатчилигини ўргатади». 

Бу ҳақда «ўз уйларида чақирилмаган меҳмонларни кўрган Шимолий Америка ҳиндулари, корейслар, вьетнамликлар, ироқликлар, панамаликлар, югославияликлар, ливияликлар, сурияликлар ва бошқа кўплаб бахтсиз одамлар кўп нарсаларни айтиб беришади».

Энтони Блинкен, шунингдек, ўз баёнотида Қозоғистон тартибсизликларни бостириш учун нега ташқи ёрдамга эҳтиёж сезганини АҚШ тушуна олмаётганини айтган.