Россия мусулмонлар диний ассамблеяси раиси, муфтий Албир Кргановнинг РИА Новостига берган интервьюсида айтишича, мусулмонларнинг жума кунида дам олиши масаласини жамоатчилик билан муҳокама қилиш керак.

«Уч асосий дин вакиллари – насронийлар, мусулмонлар ва яҳудийларнинг дам олиш кунлари жума, шанба ва якшанбага тўғри келади. Яҳудийлар учун шанба, насронийлар учун якшанба дам олиш куни. Бу Россиядаги умумий дам олиш кунларига тўғри келади. Бироқ мусулмонлар учун дам олиш куни  бўлиши керак бўлган жума Россияда иш куни ҳисобланади. Бизда бу кунни ҳам дам олиш куни деб белгилаш бўйича таклифлар йўқ. Гарчи баъзи-баъзида мусулмонлар «агар жума куни дам олиш куни этиб белгиланса, яхши бўларди», қабилида фикр билдиришса ҳам, аниқ таклиф беришмаган. Мабодо ушбу таклиф илгари сурилса ҳам, уни жамоатчилик билан муҳокама қилиш керак», – деган Албир Крганов.

Шунингдек, муфтий жума кунини дам олиш куни сифатида белгилаш муаммо туғдирмаслигини, айрим кичик ҳолатлар туфайлигина бу таклифнинг рад этилиши эҳтимоли борлигини айтди. Унинг таъкидлашича, жума намозининг фарз амал эканлиги бу кунда мусулмонлар дам олиши кераклиги хусусида асосий ва энг катта сабаб бўлиши мумкин.