Россия озиқ-овқат ва электр инқирози билан курашаётган Ливанга 25 минг тонна буғдой ва 10 минг тонна ёқилғини инсонпарварлик ёрдами сифатида юборади. Бу ҳақда Ливан жамоат ишлари ва транспорт вазири Али Хомия журналистларга маълум қилди.

Унга кўра, Россия президенти Владимир Путин Ливанга ёрдам тариқасида буғдой ва ёқилғи бериш ҳақидаги қарорни имзолаган. 

Аммо вазир Москванинг қачон 25 минг тонна буғдой ва 10 минг тонна ёқилғи ёрдами жўнатиши ҳақида батафсил маълумот бермади. 

Эътиборлиси, Ливанни қўллаб-қувватлаш Россиянинг “дон йўлаги” бўйича келишувни тўхтатиб қўйганидан кейин пайдо бўлди. Ливан Россия ва Украина ўртасида февраль ойида бошланган уруш туфайли озиқ-овқат етишмовчилигидан энг кўп зарар кўрган давлатлар қаторида. 

Очиқ манбаларга кўра, Ливан аввал буғдойнинг 65 фоизини Украина ва Россиядан импорт қилган. 

Туркия ва БМТ раҳбарлигида Украина билан Россия ўртасида имзоланган “дон йўлаги” келишуви доирасида Украинадан йўлга чиққан Ливаннинг биринчи дон кемаси 26 сентябрь куни мамлакат шимолидаги Триполи портига етиб борганди. 

Россия 29 октябрь куни Украинадан ғалла оқиб чиқишини таъминлаган келишувни тўхтатганини эълон қилди.