Иордания қироли Абдулла II Иорданияда расмий ташриф билан бўлиб турган Саудия Арабистони валиаҳд шаҳзодаси Муҳаммад бин Салмон билан минтақавий ва халқаро масалаларни, икки томонлама ҳамкорликни кучайтириш имкониятларини муҳокама қилди.
Иордания Қироллик маҳкамасидан берилган хабарга кўра, валиаҳд шаҳзода бин Салмоннинг расмий ташрифи доирасида пойтахт Аммандаги Ал-Ҳусайния саройида кенгайтирилган музокаралар бўлиб ўтди.
Қирол Абдулла ва шаҳзода Муҳамммад икки давлат ўртасидаги муносабатлар даражасидан мамнун эканликларини, уларни барча соҳаларда янада мустаҳкамлашга тайёрликларини билдирди.
Учрашувларда иқтисодий ҳамкорликни мустаҳкамлаш имкониятлари ва Саудия Арабистони Иордания инвестиция жамғармаси ҳисса қўшиши мумкин бўлган соҳалар муҳокама қилинди.
Қирол Абдуллоҳ Саудия Арабистони хавфсизлигини Иордания ва минтақа хавфсизлиги деб билишларини эслатди. Иордания барча таҳдидларга Ар-Риёзнинг ёнида қарши туради.
“Мақсадимиз – Иордания ва Саудия Арабистони манфаатлари йўлида ҳамкорликнинг янги босқичини тезлаштириш”, — деди Салмон учрашув чоғида.
Иорданияда катта имкониятлар мавжудлигини қайд этган шаҳзода ҳар икки давлат сармоя орқали бир бирининг ривожланиши учун самарали ҳисса қўшишга қарор қилганликларини таъкидлади.
Учрашув сўнгида Қирол Абдулла Саудия Арабистони валиаҳд шаҳзодасига икки давлатни боғловчи буюк тарихий муносабатларни чуқурлаштиришдаги хизматлари учун Ҳусайн бин Али ордени билан тақдирлади.
