"Кўпгина Европа давлатларида Владимир Путин ва Россияга нисбатан яширин симпатия бор", дея маълум қилди Испания бош вазири Педро Санчес. Бу ҳақда “РБК-Украина” La Vanguardia нашрига таяниб хабар берди.
"Россия автократи дунёни иккига бўлиш ва вақтни орқага қайтаришга бўлган реакцион истагини амалга ошириш йўлида ёлғиз эмас. Унинг Европада кўплаб иттифоқчилари бор, улар ҳозир Путинга хайрихоҳликларини яширишади. Лекин бир йил олдин улар Путиннинг ҳузурига келиб, унинг сиёсатини мақташган эди", деди Педро Санчес Давосдаги Жаҳон иқтисодий форумида.
Эслатиб ўтамиз, Россия Федерациясининг Украинага кенг кўламли бостириб кириши бошланганидан кейин Италиянинг собиқ бош вазири Силвио Берлускони Путин билан алоқада бўлганликда айбланган эди. Шунингдек, Германия киберхавфсизлик агентлиги раҳбари Арне Шёнбом ҳам Россия сиёсий элитаси билан яқин муносабатларда айбланган.
Аввалроқ украиналик ҳарбий хизматчилар Испанияга HAWK номли ҳаво ҳужумидан мудофаа тизими бўйича бошланғич тайёргарлик учун келгани ҳақида хабар берилган эди. Ушбу ўқув машғулотида 225 ҳарбий қатнашган.
Январь ойи бошида "РБК-Украина" Украина президенти Владимир Зеленский Испания бош вазири Педро Санчес билан телефон орқали мулоқот қилгани ҳақида хабар берган эди. Ўшанда томонлар Украинанинг мудофаасидаги эҳтиёжларни муҳокама қилган.
