Бу ҳақда Россия президентининг матбуот котиби Дмитрий Песков маълум қилди. 

Россия президенти Владимир Путин 13 октябрь куни Қозоғистонда Туркия президенти Ражаб Тоййиб Эрдоған билан учрашади.  

Песковнинг сўзларига кўра, президентлар Украина масаласи ва икки томонлама муносабатларни муҳокама қилади.

«Ҳа, аниқ! Ҳақиқатан ҳам учрашувга тайёргарлик кўрилмоқда. Лекин эртага эмас, эртадан кейин. Албатта, мавзу аниқ — Украина ҳам, жуда кўп қиррали икки томонлама муносабатлар ҳам ва умуман, долзарб масалалар бўйича фикр алмашиш», — деди Песков.

Аввал хабар берганимиздек, 14 октябрь куни Қозоғистон пойтахти Остона шаҳрида олий даражадаги «Марказий Осиё — Россия» саммити ва МДҲ давлатлари раҳбарлари кенгаши мажлиси ўтказилади. Учрашув Россия ва Марказий Осиёнинг барча бешта давлати ўртасида дипломатик муносабатлар ўрнатилганининг 30 йиллиги муносабати билан ўтказилмоқда.

Эслатиб ўтамиз, ушбу саммитда Давлатимиз раҳбари Шавкат Мирзиёев ҳам иштирок этади.