Покистон радиоси бугун, 17 декабрда Покистон ташқи ишлар вазири Шоҳ Маҳмуд Қурайший Афғонистон банк тизимини қайта ишга тушириш зарурлигини таъкидлади, деб хабар бермоқда.
Бу ҳақда Шоҳ Маҳмуд Қурайший Исломободда ОАВ билан мулоқот чоғида маълум қилди. Хорижда яшовчи кўплаб афғон фуқаролари пул ўтказмалари орқали ватандаги оилаларига ёрдам беришни истайди, деган у. Қурайший гуманитар фалокат эҳтимоли ҳақида огоҳлантирди ва Афғонистоннинг энг яқин қўшниси сифатида Покистон қўшни давлатдаги вазиятдан хавотирда эканини таъкидлади. Ислом ҳамкорлик ташкилоти Ташқи ишлар вазирлари кенгашининг 19 декабрь куни бўлиб ўтадиган навбатдан ташқари сессияси муносабати билан у ИҲТ кўп йиллардан буён афғонларни қўллаб-қувватлаб келаётганини эслатган.
Афғонистондаги вазият ҳақида гапирган Қурайший террор ташкилотлари гуманитар инқироз ва иқтисодий таназзулдан фойдаланиб, Афғонистондаги фаолиятини кучайтиришини айтган. Покистон ташқи ишлар вазири Афғонистондан келаётган қочқинларнинг янги оқими нафақат Покистон, балки Европага ҳам таъсир қилишини таъкидлаган. Унинг алоҳида таъкидлашича, Покистон “Толибон”нинг на тарафдори, на вакили ҳисобланади. Афғонистон ташқи ишлар вазири вазифасини бажарувчи ИҲТ йиғилишида иштирок этади.
Ислом ҳамкорлик ташкилоти Ташқи ишлар вазирлари кенгашининг навбатдан ташқари йиғилиши 19 декабрь куни бўлиб ўтиши ҳақида хабар берилган.
