Пайғамбаримиз алайҳиссаломнинг энг машҳур икки исмлари бўлиб, булар: Муҳаммад ва Аҳмаддир.
«Муҳаммад» исмининг маънолари:
1) тўхтовсиз, тинимсиз ва доимо мақталадиган, яъни мақталаверади, мақталаверади ва яна мақталаверадиган (барча пайғамбарлар ҳам мақталадилар, аммо Расулуллоҳ соллаллоҳу алайҳи васаллам тўхтовсиз мақталадилар);
2) мақтовга муносиб сифатлари, мақтовли хислатлари, мақтовга лойиқ амаллари ва тақдирланарли ишлари жуда кўп (барча пайғамбарларнинг мақтовга муносиб сифатлари, мақтовли хислатлари, мақтовга лойиқ амаллари ва тақдирланарли ишлари бор, аммо Расулуллоҳ соллаллоҳу алайҳи васалламники ҳаммасидан кўпроқдир);
3) барча фазилатлар эгаси (барча пайғамбарлар фазилат эгалари бўлиб, ўз умматларига намуна ва комил инсон бўлганлар, аммо Расулуллоҳ соллаллоҳу алайҳи васаллам барча фазилатларни ўзларида жамлаган бўлиб, қиёматгача келадиган бутун инсоният учун энг мукаммал ва энг гўзал намунадир).
«Аҳмад» исмининг маъноси:
Аллоҳ таолога энг кўп ҳамду сано айтувчи (барча пайғамбарлар Аллоҳ таолога ҳамду сано айтишган, аммо Расулуллоҳ соллаллоҳу алайҳи ва саллам улардан кўпроқ айтганлар).
Эслатиб ўтамиз, Пайғамбаримиз алайҳиссаломнинг ушбу икки исмлари Қуръони каримда келтирилган бўлиб, Муҳаммад исми тўрт марта, Аҳмад исми эса бир марта зикр қилинган.
У зот алайҳиссаломга чексиз саловат ва саломлар бўлсин!
Абдул Азим Зиёуддин
