Венгрия Бош вазири Виктор Орбан Будапештда Венгрия ва Греция терма жамоалари ўртасида бўлиб ўтган ўртоқлик учрашувига борди. У ерда 1920 йил – мамлакат таркибига Руминия, Aвстрия, Словакия, Сербия, Хорватия ва Украинанинг ғарбий қисми кирган пайтлар харитаси тасвирланган шарфда омма олдида пайдо бўлгани зиддият келтириб чиқарди. Киев ва Бухарестдаги Венгрия элчилари Украина ва Руминиянинг ташқи ишлар вазирликларига чақирилди.
Руминия Ташқи ишлар вазирлигида Венгрия элчисига бош вазирнинг ҳаракатларидан қатъий норозилик билдирилди. Украина ташқи ишлар вазирлиги Венгрия томонидан кечирим сўрашни ва мамлакатнинг ҳудудий яхлитлигига тажовузни рад этишни талаб қилди.
"Виктор Орбан Венгрия Украина ҳудудининг бир қисми билан тасвирланган шарф билан футбол ўйинига келди. Венгрияда ревизионизм (чегара масаласини қайта кўриб чиқиш) ғояларини тарғиб қилиш Украина-Венгрия муносабатларининг ривожланишига ҳисса қўшмайди ва Европа сиёсати тамойилларига мос келмайди", деб ёзган Украина ташқи ишлар вазирлиги вакили Олег Николенко фейсбук саҳифасида.
1921 йил июлда Трианон тинчлик шартномаси бўйича Венгрия (Aвстрия-Венгриянинг ворисларидан бири сифатида) биринчи жаҳон уруши тугаганидан кейин аввалги ҳудудининг учдан икки қисмини йўқотган эди.
Ҳозирги Бош вазир Орбан сўнгги йилларда Будапешт ва Москва ўртасидаги яқин алоқалар ва Россиянинг кенг кўламли босқинига қарши туриш учун Украинага ҳарбий ёрдам беришдан бош тортгани учун танқид қилинмоқда. Хусусан, 26 март куни Венгрия бош вазири Россия нефть ва газига қарши эмбаргони қўллаб-қувватламаслигини билдирган. Зеленскийнинг Россияга қарши ҳарбий ёрдам ва санкциялар тўғрисидаги талаблари Венгрия манфаатларига зид эканлигини ва иқтисодиётга салбий таъсир кўрсатишини айтган.
