Тоқаев пойтахт номи ўзгартирилишига рози бўлди.

Қозоғистон пойтахти номи яна Остонага айланиши мумкин. Қосим-Жомарт Тоқаев бу таклифга розилик билдирган ва конституцион қонун лойиҳасига киритилган.

“Президент депутатларнинг бу ташаббусидан хабардор, улар ўз навбатида аҳоли билан учрашувлар давомида тушган таклифлар асосида уни ишлаб чиққан”,  – деган Тоқаевнинг матбуот котиби Руслан Желдибай.

Шу билан бирга давлат раҳбари Назарбоев номига қўйилган бошқа объектлар номланиши сақланиб қолиши тарафдори эканлиги айтилган.

Эътиборли томони, айнан Тоқаевнинг ўзи 2019 йилда Қозоғистон пойтахти номини Остонадан Нур-Султонга ўзгартиришни таклиф қилган эди.

Аввалги номи Ақмола бўлган Қозоғистон пойтахтининг номи совет даврида Акмолинск, Целиноград каби номларга ўзгартирилган. Мустақилликдан сўнг Акмолага ўзгартирилган шаҳар номи Остонага ўзгартирилган ва 2019 йилда Нур-Султонга айлантирилган эди. Энди пойтахт яна Остона номини олади.