Маълумки, шу йилнинг 6 февраль куни турк қардошларимиз бошига тушган улкан кулфат ҳаммамизнинг қалбимизни маҳзун қилди. Биродар давлат Туркияга мамлакатимиз биринчилардан бўлиб ёрдам қўлини чўзди – ўша куниёқ 100 нафар қутқарувчиларимиз вайроналар остида қолганларни қутқариш учун жўнаб кетди. Шу аёзли кунларда бошпанасидан ўн минглаб қардошларимизга зарурий нарсаларни йиғиш кампанияси бошлаб юборилди. Бугун эса яна 71 нафар махсус ходимлар ёрдам бериш учун Туркияга етиб борди.
Бошига мусибат тушган диндошининг кўнглини олиш, тасалли бериш ва таъзия билдириш – мусулмонларнинг мусулмондаги ҳақларидан биридир. Бугун ана шу ҳақни ўташ, қардошларимизга таъзия билдириб, икки оғиз илиқ сўз билан кўнгилларини кўтариш учун "Аzon New Media" бир гуруҳ ходимлари ва Халқ депутатлари Тошкент шаҳар Кенгаши депутати Бобур Расулов Туркиянинг Ўзбекистондаги элчихонасига боришди. Туркиянинг мамлакатимиздаги фавқулодда ва мухтор элчиси жаноб Олган Бекар ва бошқа расмийларга таъзия изҳор этиб, элчихонада очилган ҳамдардлик китобига самимий тасалли сўзларини ёзиб келишди.
