Мисрнинг Гиза шаҳридаги черковда содир бўлган ҳалокатли ёнғин мусулмонлар ва насронийларни бирлаштирди. Мусулмонлар ёнғиндан жабр кўрганларга ёрдам қўлини чўзди. Масалан, «OnTime Sports» нашри хабарига кўра, «Ливерпул» ҳужумчиси Муҳаммад Салоҳ жабрланганларни қўллаб-қувватлаш ва черковни қайта тиклаш мақсадида 3 миллион Миср фунт стерлинг хайрия қилди.
Черковда содир бўлган кондиционердаги электр носозлиги оқибатида ҳалокатдан сўнг Салоҳ ижтимоий тармоқ орқали жабрланганларга ҳамдардлик билдирди.
Ёнғин пайтида Муҳаммад Яҳё ёнғиндан беш нафар болани қутқариб қолди. Черковга қўшни яшовчи мусулмоннинг сўзларига кўра, черков атрофидаги бақир-чақирни эшитиб, дарҳол ибодатхона томон шошилади. У аланга ичидан одамларни олиб чиққан.
Эслатиб ўтамиз, икки ҳафта аввал содир бўлган ёнғин оқибатида 41 киши ҳалок бўлганди. Унга электрогенераторнинг бузилиши сабаб бўлган. Ҳуқуқни муҳофаза қилувчи идоралар 33 кишини сўроқ қилган. Уларнинг 16 нафари жабрланувчи бўлган. Улар электр зарядлари овозларини эшитганини айтган. Шундан кейин ёнғин бошланиб кетган. Миср бош прокурори Ҳамад ал-Савининг сўзларига кўра, қурбонлар ҳаво етишмаслиги ва тутун оқибатида вафот этган.
