Молдова парламенти спикери Игор Гросу 15 май куни унга МДҲ Парламентлараро ассамблеяси аъзолигидан чиқиш имконини берувчи тартибни бошлашини ва мамлакатнинг ташкилотдан тўлиқ чиқиши йўлидаги биринчи қадам бўлишини маълум қилди.
Гросунинг сўзларини Молдовадаги Newsmaker нашри келтирган.
«Парламент раиси сифатида мен Молдованинг МДҲ Парламентлараро Ассамблеяси таркибидан чиқиши бўйича тартиб ташаббуси билан чиққанимни эълон қиламан», — деган Гросу.
Унинг қўшимча қилишича, у ташаббусни фуқаролар, ҳокимиятдаги партиянинг Ҳаракат ва бирдамлик (PAS) парламент фракцияси, шунингдек, президент Майя Санду билан муҳокама қилган.
Гросу ўз ташаббусини бош вазир Дорин Речануга етказиш ва парламент Доимий бюросининг навбатдаги йиғилишига қонун лойиҳасини тайёрлаш ниятида эканлигини таъкидлади.
«МДҲ асосчиси Россия Украинага ваҳшиёна ҳужум қилганидан кейин бу ташкилотни энди ҳамдўстлик деб аташ мумкин эмас. Бу Украина ташкилотдан чиқиб кетганидан кейин географик жиҳатдан ажралиб турган мамлакатнинг МДҲ таркибидан чиқиши йўлидаги биринчи қадам бўлади», — деди спикер.
«Биз ёвузлик, уруш ва қашшоқлик манбасидан ажралиб чиқишга тайёрмиз. 30 йил давомида биз фаровонлик ва демократия, яхши келажак сари интилаётганимизни исботладик. МДҲ собиқ иттифоқ республикаларини назорат остида ушлаб туриш учун Россия томонидан СССР харобаларида тузилган ташкилотдир. Биз энди тажовузкор давлат билан бир хил музокара столида қола олмаймиз», деган Гросу.
Молдова ҳамон МДҲ аъзоси ҳисобланади, бироқ апрель ойида мамлакатда Мустақил Давлатлар Ҳамдўстлиги доирасидаги айрим шартномаларни денонсация қилиш жараёни бошланди.
Февраль ойида ўша пайтдаги бош вазирликка номзод ва Молдова ҳукуматининг амалдаги раҳбари Дорин Речану МДҲ доирасида тузилган келишувларни денонсация қилишни бошлашга ваъда берган эди.
2022 йил март ойида ЕИга аъзо бўлиш учун ариза топширгандан сўнг, президент Майя Санду Молдова «Европа йўлида етарлича олға силжиш»га эришганида, мамлакат МДҲдан чиқиш вақтини танлашини таъкидлаган эди.
