Россия Тергов қўмитаси раиси Александр Бастрикин мамлакат президенти Владимир Путинга иммиграция қонунчилигини кучайтириш таклифи билан мурожаат қилди. Бу ҳақда Вaza хабар берган.
Нашрнинг ёзишича, декабрь ойи охирида Бастрикин Путинга мактуб йўллаган ва унинг фикрича, вазиятни кескинлаштириб, халқ отрядлари шаклланишига олиб келган мигрантларнинг жиноятлари ҳақида ҳикоя қилган. Бастрикиннинг хабар беришича, 2021 йилнинг 11 ойида чет элликлар Россияда 33,5 минг жиноят содир этган. Улар орасида у Ленинград вилоятининг Виборг шаҳрида Ўзбекистоннинг олти фуқароси икки полиция майорини калтаклаган ҳодисани алоҳида таъкидлаган.
Бундан ташқари, Бастрикин муҳожирларнинг хатти-ҳаракатлари ва тадбиркорлар мигрантларнинг «қуллик» позициясидан манфаатдорлиги туфайли россияликларнинг жиддий ташвишига ишора қилган.
Шу муносабат билан у иш берувчиларга миграция қонунчилиги бажарилишини таъминлаш, мигрантларни геномик рўйхатга олишни жорий этиш ҳамда йирик шаҳарларда «аҳоли этник-маданий мувозанатини сақлаш» чораларини кўриш мажбуриятини юклашни таклиф қилган. Шунингдек, ижтимоий кескинликни камайтириш муҳожирлар ўрнига Россия фуқаролари ишга олиш кераклигини таъкидлаган.
Февраль бошида Давлат Думасининг Ахборот сиёсати, ИТ ва оммавий ахборот воситалари қўмитаси раиси Александр Хинштейн ҳам Россиядаги муҳожирлар муаммосига тўхталган эди. Унинг иддаосига кўра, Россияга келаётган муҳожирлар «ҳеч қачон ўз миллатининг энг яхши вакиллари, шифокорлар, мусиқачилар ёки фан докторлари эмас, балки саводсиз, ихтисослиги йўқ, бир бурда нон учун ишлашга тайёр одамлар» эмиш.
Россиялик олим, профессор Сергей Абашиннинг фикри рус амалдорларининг фикридан бошқача. У шундай ёзади:
“Сўнгги пайтларда Россия жамиятини мулозимлар ва мутахассислар муҳожирлар жинояти қандайдир таҳдидли даражада ошиб бораётгани ва чора кўриш зарурлиги билан қўрқитишмоқда.
Келинг, расмий статистик маълумотларни кўриб чиқайлик. 2013 йилда МДҲ давлатларидан келган чет эл фуқаролари 40,3 минг, 2019 йилда 31 минг, 2020 йилда 30,8 минг, ўтган 2021 йилда 28,5 минг жиноят содир этган. Яъни, мутлақ маънода МДҲ давлатларидан келган фуқаролар томонидан содир этилган очилган жиноятларнинг сони 2013 йилдан 2021 йилгача 29 фоизга, 2019 йилдан 2021 йилгача 8 фоизга, 2020 йилдан 2021 йилгача 7,5 фоизга камайган.
Нисбий жиҳатдан: МДҲ давлатлари фуқаролари томонидан содир этилган жиноятлар сони очилган жиноятлар сонига нисбатан 2013 йилда 3,2%, 2019 йилда 2,9%, 2020 йилда 3%, 2021 йилда 2,7% ни ташкил этган”.
Azon.uz сайтининг миграция ишлари бўйича эксперти Ботиржон Шермуҳаммад Александр Бастрикиннинг сўзларини шарҳлар экан: “Мигрантлар билан боғлиқ тўполонлар бўлиб туради. Лекин қизиғи шундаки, тўполон ва оммавий муштлашувлар Россия парламентига сайлов пайтида тез-тез учраётгани уларнинг сунъий равишда уюштирилмаётганмикин, деган шубҳа туғдирди. Парламент сайловида сайловчиларни муаммолардан чалғитиш, “Единая Россия” партиясининг рейтингини ошириш, овоз олиш учун мигрантлардан “олабўжи” ясаш, уларни душман қилиб кўрсатиш, ҳаётдаги муаммоларнинг сабабчиси қилиб кўрсатиш доим бўлиб келган. Ҳар сафар хоҳ президент сайлови, хоҳ парламент сайлови бўлсин, Россия сиёсатчилари мигрантлар мавзусини кўтариб, шу орқали аҳолининг овозини олишга ҳаракат қилишади. Бастрикин бу гапларни ҳозир айтишига сабаб, ҳозирги кунда Россия жамиятида муаммо кўпайиб кетган, оддий фуқаролар кўп нарсадан норози, шу нарсани ҳукумат вакиллари ҳар доимгидек, “мана биз ишлаяпмиз, мигрантлар айбдор” деган ниятда кўтариб чиқишган. Бироқ ҳукуматнинг ўзи берган статистикаси унинг сўзлари нотўғри эканлигини кўрсатиб турибди”.
