Туркиянинг Караман шаҳрида кўзи ожиз муаззин Кайра Айдемир ўзи каби кўзи ожиз инсонларга бўртма ҳарфлар билан Қуръон ўргатишга ҳаракат қилмоқда. Бу ҳақда Туркия Диёнат ишлари вазирлиги (муфтийлик) расмий сайти хабар бермоқда.
Мазкур шаҳардаги Меъмор Синон масжидида муаззинлик қилувчи Кайра Айдемир кўзи ожизлар учун бошланғич ва ўрта мактабда таҳсил олган.
Айдемир ўрта мактабгача бўртма ҳарфлар билан Қуръон ўқиш ва ўрганиш қобилиятидан ҳеч қандай маълумотга эга бўлмаган. У Қуръонни ўқишни жуда хоҳлаган ва имом хатиб ўрта мактабига ўқишга кирганидан сўнг ўзи каби кўзи ожиз ўқитувчи ёрдами билан ўрганган.
Ўрта мактабдан сўнг илоҳиёт факультетини тамомлаган Айдемир муаззинликка тайинланади. Айдемир ўзи каби кўзи ожиз инсонларга Қуръон ўқишни ўргатиш ўзгача завқ эканини айтди.
Айдемир Караман ёшлар марказида кўзи ожизлар учун Қуръон ўрганиш курси ва спорт тўгарагини ташкил этди.
“Лойиҳанинг мақсади кўриш қобилияти заиф ўқувчилар учун ҳаётий қўлланмамиз Қуръонни ўқишда ёрдам беришдир. Қуръони Каримни ўргатиш, бу одамларнинг ўзига бўлган ишончини қўллаб-қувватлаш, ижтимоийлашувига ҳисса қўшишдир”, деди Айдемир.
Айдемир 4 йилдан буён Туркия муфтийлигига қарашли курсларда Қуръон ўргатиш учун дарс бериб келади.
Маркур курс ўқувчиси Орхан Буюкэкан Қуръон ўрганишни жуда хоҳлаётганини айтади:
"Мен доим дуо қилардим: Имконият бўлса ўрганардим. Бундай курс борлигини эшитиб, дарҳол ҳужжат топширдим ва ўқишни бошладим. Курсларга келаяпман.Мен жуда хурсандман, хотиржамман. Кўзим билан эмас, қўлим билан ўқийман. Кўзи ожизлигим Қуръонни ўрганишимга тўсқинлик қилмади, дейди у.
