Прокуратура идоралари томонидан спорт ва маданий мерос соҳасида қонунчилик ижроси устидан назорат тадбирлари тизимли равишда давом этмоқда.

Тадбирлар давомида спорт таълим муассасаларини жорий таъмирлаш бўйича ўтказилган тендерлардаги коррупциявий схемалар фош этилди.

Жумладан, 2019-2021 йилларда республика бўйича жами 72 та спорт мактабда 13,5 миллиард сўмлик жорий таъмирлаш бўйича ўтказилган тендерларда кафилланган шахсларнинг иштирок этишига йўл қўйилиб, коррупциявий ҳолатларнинг келиб чиқишига замин яратилган.

Масалан, Бухоро олимпия захиралари коллежи биносини жорий таъмирлаш учун коллеж директори раислигида ўтказилган гўёки очиқ тендер танловларида фақат тадбиркор Ф.Қ. таъсисчилигидаги 4 та корхона қатнашиб, уларнинг биттаси ғолиб деб топилган. 

Ёки, пойтахтдаги Гимнастика спорт мактаби биносини таъмирлаш учун ўтказилган тендерда қатнашган “F.t” МЧЖ таъсисчиси ва тендер ғолиби “S” МЧЖ раҳбари бир шахс – Қ.Ф. эканлиги ҳамда у мактаб директорининг акаси эканлиги аниқланди.

Бу каби қонун бузилиши ҳолатлари Сурхондарёда 10 та, Қорақалпоғистонда 9 та, Навоий ва Қашқадарёда 8 тадан, Фарғона ва Наманганда 7 тадан, Самарқандда 5 та, Жиззах ва Хоразмда 4 тадан, Бухоро ва Сирдарёда 3 тадан, Тошкент шаҳрида 2 та ҳамда Андижон ва Тошкент вилоятларида 1 тадан кузатилган.

Аниқланган барча қонун бузилиши ҳолатлари бўйича айбдор шахсларнинг жавобгарлик масаласи қонунчиликда белгиланган тартибда ҳал этилди.

Назорат тадбирлари давом эттирилмоқда.