Январь ойида Пекин ўз фуқароларининг чет элга чиқишини тақиқламаслигини  эълон қилганидан сўнг, Америка Қўшма Штатлари Хитойдан келганлар учун кириш чекловларини жорий қилмоқда. 

“5 январдан бошлаб Хитойдан учиб кетаётган икки ёш ва ундан катта бўлган барча йўловчилар Хитой, Гонконг ёки Макаодан учишдан икки кун олдин тестдан ўтишлари ва жўнаб кетиш чоғида авиакомпанияларга салбий тест натижасини тақдим этишлари шарт”, - дейилади хабарда. Бу ҳақда AҚШ соғлиқни сақлаш департаменти вакили маълум қилди. 

"Сўнгги пайтларда Хитойда Сovid-19 инфекциясининг тез тарқалиши вируснинг янги вариантлари пайдо бўлиш эҳтимолини оширмоқда", деди вазирлик ходими журналистларга. 

AҚШ расмийларининг таъкидлашича, Хитойда Сovid-19  билан боғлиқ вазият шаффоф эмас ва у ерда инфекциялар кўпаймоқда. 

Япония, Малайзия, Тайван ва Ҳиндистон аллақачон Хитой фуқаролари учун кириш назоратини кучайтириш чораларини киритган, кейин эса чоршанба куни Италия ташриф буюрувчилар учун мажбурий коронавирус скринингини жорий этиш режаларини эълон қилган. 

Милан аэропортида бундай текширувлар аллақачон олиб борилмоқда ва la Repubblica газетасига кўра, бир куни Хитойдан Малпенса аэропортига қўнган рейслардан бирида йўловчиларнинг 52 фоизида коронавирус аниқланган. 

Расмий маълумотларга кўра, ўтган ҳафтада Хитойда кунига 4000 га яқин Сovid-19  инфекцияси ва кам сонли ўлим ҳолатлари қайд этилган. 

Саёҳат чекловлари олиб ташланишидан олдин, Хитой фуқароларига чет элга чиқмаслик қатъиян тавсия этилган ва гуруҳ саёҳатлари расман тақиқланган. 

Чекловлар олиб ташланганидан атиги ярим соат ўтгач, сайёҳлик агентликлари веб-сайтлари ўтган йилнинг декабрига нисбатан йўналишлар бўйича қидирувлар сони ўн баравар кўпайганини қайд этди. Энг кўп йўналишлар Макао, Гонконг, Япония, Таиланд ва Жанубий Корея бўлди. 

Америка Қўшма Штатлари барча кирувчи хорижликлардан тўлиқ вакцина олгани ҳақидаги маълумотномани талаб қилишдан воз кечгани йўқ.