Канаданинг Via Rail компанияси ишчиси Оттавадаги темир йўл вокзалида мусулмон эркакдан намоз ўқимасликни сўрагани учун ишидан бўшатилди.
CTV News Ottawa пайшанба куни хабар беришича, ўзини Аҳмад деб таништирган мусулмон эндигина бўш йўлакда намоз ўқиб бўлганидан кейин қўриқчи унга яқинлашиб: “Бу ерда намоз ўқима... Кейинги сафар ташқарида намоз ўқигин”, деган.
Аҳмаднинг ахборот каналига айтишича, воқеа душанба куни Канада пойтахтидаги вокзалда юз берган.
Ottawa Citizen веб-сайтига кўра, кенг тарқалган воқеа видеосида қўриқчи эркакка унинг намози станциянинг бошқа фойдаланувчиларига халақит бераётганини айтган.
Via Rail Аҳмад ва бутун мусулмон жамоасидан узр сўради ва тўлиқ тергов ўтказишга ҳамда унинг хулосалари асосида “тегишли чора” кўришга ваъда берди.
Via Rail ва Канада мусулмонлари миллий кенгаши фуқаролик ҳуқуқлари ва ҳимояси гуруҳи "бахтсиз ҳодиса" деб баҳоланган воқеани муҳокама қилиш учун ўтказилган йиғилишдан сўнг, ҳар икки томон конструктив музокаралар ўтказганлиги ва хавфсизлик ходими бу борада нотўғри ҳаракат қилгани ҳақида қўшма баёнот тарқатди.
"Суҳбат умумий мақсадларга қаратилди, яъни Via Rail йўловчилар ва ходимлар диний эркинлик, жумладан, ибодат қилиш имкониятини амалда ҳис қилишда ўзларини хавфсиз ҳис қиладиган инклюзив муҳитни таъминлашга қаратилган", дейилади баёнотда.
Соқчи Аҳмадга: “Бу ерда намоз ўқишингни хоҳламаймиз. Сен бошқа мижозларимизни безовта қиляпсан, тушундингми?", деган.
Аҳмад CTV News телеканалига берган интервюсида воқеадан ҳайратда қолганини, ранжиганини ва унга нисбатан ҳурматсизлик қилинганини айтди.
У: “У мени хижолатга солди. Мен ранжидим. Наҳот бу Канада? Наҳот бу ер мамлакат пойтахти? Наҳот шу ер Оттава бўлса?", дея ажабланганини айтди.
Via Rail расмийларининг таъкидлашича, фирма ўзининг инклюзия сиёсатини Канада мусулмонлари миллий кенгаши (КММК) билан баҳам кўради ва кенгаш билан билан келажакда ушбу ҳодисаларнинг олдини олишга ёрдам берадиган зарур ислоҳотлар устида ишлайди.
Темир йўл компанияси, шунингдек, исломофобия ва ҳар қандай камситувчи хатти-ҳаракатларни кескин қоралашини таъкидлади.
