Ички ишлар ходимлари жамиятда содир бўлаётган иллатларга қарши курашувчи инсондир. Жиноят қилаётган, жиноят қилган ёки гумонланувчини қамоққа олишга, бўлинмага олиб боришга ваколати бор. Баъзан бу ваколатни кенгайтириб олиб, журналист ёки блогерларнинг фаолиятига тўсқинлик қилаётган, кейин узр сўраб чиқаётган ИИБ ходимлари ҳам учраб турибди. Бу гал воқеа “Дарё.уз” журналисти билан содир бўлди.
Маълум бўлишича, сайт журналисти Тошкент шаҳридаги кўп қаватли уйда содир бўлган ёнғин тафсилотларини ўрганиш мақсадида воқеа жойига борган. Журналист ҳолатни тасвирга олаётган пайтда ИИБ формасидаги ходим унинг ёнига келиб, тасвирга олишига қаршилик кўрсатган. Бошқа бир фуқаро эса журналистни тепиб, видеотасвирга олишига қарши эканини айтган. Журналист ИИБ ходимига интернет-нашри журналисти эканини айтиб, ўзини таништириши кераклигини, уни тепиб, фаолиятига қаршилик кўрсатаётган фуқаро билан шуғулланиши кераклигини билдирган. Аммо ходим ёнғин содир бўлаётган пайтда ўзини таништирмаганини айтиб, журналистга бўлимга боришлари кераклигини уқтирган.
Журналист эса ИИБ ходимига у иш билан машғул эканини, унинг фаолиятига тўсқинлик қилганидан кўра журналистни тепган фуқаро иши билан шуғулланиши кераклигини айтган. Ва буни фуқаронинг оғзаки мурожаати сифатида қабул қилишини сўраган. Қолаверса, нотаниш кимса тепкиси сабаб ўзида оғриқ борлигини, шу боис айни пайтда ёзма тарзда ариза беролмаслигини таъкидлаган.
«Мен Мусулмонбек Иброҳимовнинг журналист эканини билмадим, бошқа бир фуқаро воқеани тасвирга оляпти деб ўйладим. Шу сабаб унинг видеога олишига қаршилик қилдим. Бу ишим учун узр сўрайман», — дейди 69-сонли «Лашкарбеги» маҳалласида профилактика инспектори сифатида фаолият юритишини айтган Зафар исмли ходим.
Аниқланишича, журналистни 69-сонли «Лашкарбеги» маҳалласидаги ҳуқуқ-тартибот масканига олиб борган ИИБ ходимлари — Зафар ва Азиз журналист телефонига бизни видеога олди деган гумонда, шунингдек, унга мажбурлаб ариза ёздириш мақсадида қўлини орқага қайирган ва куч ишлатган.
«Бу ҳаракатимиз учун узр сўраймиз», — дейди ИИБ ходими.
Воқеа ҳақида хабар топган масъуллар — туман ИИБнинг профилактика инспекторлари билан ишловчи ходими воқеа жойига келиб, тўлиқ маълумотга эга бўлгач, «Дарё» журналисти Мусулмонбек Иброҳимовдан узр сўради. Шунингдек, ходимларига оғзаки танбеҳ берди. Журналист эса бағрикенглик қилиб, уларни кечирди. Журналистга тиббий ёрдам кўрсатилди.
Ёнғин чиққан жойга кириб бориш мумкин эмас, атрофидан кўпчилик суратга видеога олади. Бунда журналист бўлмаганлар ҳам фаол. Лекин журналистик материал тайёрлаётган ходим ишига аралашиб, уни тепган фуқаро қолиб журналистни идорга судраш...
Майли, кечирим сўраш одатий ҳол бўлиб боряпти.
