Ижтимоий тармоқларда бугун, 1 июль куни Нукус шаҳрида айрим фуқаролар кутилмаганда кўча юришларини ташкил қилиб, Марказий деҳқон бозорида тўпланиб, намойишлар уюштиргани ҳақида хабарлар тарқалди. Ушбу ҳолат юзасидан Ички ишлар вазирлиги Матбуот хизмати қуйидаги баёнотни берди.

“Жорий йилнинг 1 июль куни соат тахминан 15.00 лардан бошлаб Қорақалпоғистон Республикаси Нукус шаҳрида айрим фуқаролар, республикамизда амалга оширилаётган конституциявий ислоҳотларни нотўғри талқин қилишлари оқибатида, кутилмаганда кўча юришларини ташкил қилиб, Нукуснинг Марказий деҳқон бозорида тўпланиб, намойишлар уюштиришган.

Мазкур ҳолат юзасидан, жамоат тартибини бузилишини олдини олиш ҳамда фуқаролар томонидан турли тартиббузарликларни содир этишларига йўл қўймаслик мақсадида, деҳқон бозори ҳудудига ҳуқуқни муҳофаза қилиш органларининг куч ва воситалари жалб этилган.

Ҳозирда жамоат тартиби тикланиб, фуқароларнинг қонунбузарлик ҳолатларига йўл қўймасликлари ва барча мурожаатлари ўрнатилган тартибда кўриб чиқилиши бўйича тушунтириш ишлари олиб борилмоқда”, дейилади ИИВ баёнотида.

Фуқароларимиздан турли асоссиз ва нохолис хабарларни тарқатмасликни ҳамда ҳар хил иғво ва фитна гапларга ишонмасликларини сўраб қоламиз.