Пандемиядан кейин биринчи Рамазонни нишонлаётган Италиядаги мусулмонлар халқ орасида «Тикланиш ва озодлик Рамазони» деб аталадиган байрамдан завқланишмоқда.

Мамлакат бўйлаб масжидлар ва ислом марказлари намоз ва йиғилишлар уюштирмоқда, муҳтожларга озиқ-овқат ва ёрдам тарқатмоқда.

«Рўза менга бошқа одамлар ва биринчи навбатда, қийинчиликларга дуч келганлар билан кўпроқ мулоқот қилишимга ёрдам беради», — дейди Милан яқинидаги Брешия университетида ишлайдиган Мониа Али.

«Коронавирус тўлиқ йўқолмаган ва биз ҳали ҳам эҳтиёт бўлишимиз керак бўлса ҳам, бу йил сиз ушбу ойнинг асл маъносини, яъни бирдамлик ва ҳамжиҳатликни ҳис қилишингиз мумкин», деди Раиса Лабаран, Брешиядаги Ислом марказининг ходими.

Италия Ташқи ишлар вазирлиги мусулмонларни Рамазон ойи кириб келиши билан табриклаб, «Италия ва бутун дунёдаги бутун мусулмон жамоатчилигига осойишталик ва тинчлик тилакларини» йўллади.

Мамлакат бўйлаб кўплаб шаҳар кенгашлари ва Рим-католик епископлари ҳам маҳаллий мусулмон жамоаларини Рамазон билан табриклади.

Озиқ-овқатларни тарқатиш шаҳар масжидида ташкил этилган ва ҳар кеча Рамазон ойида у католик ва мусулмон кўнгиллилар томонидан амалга оширилмоқда.