Бугун Истанбул марказида сайёҳлар билан гавжум, диққатга сазовор бўлган кўчалардан бири Истиқлолнинг пиёдалар қатнайдиган йўлагида портлаш содир бўлганини дастлаб ТРТ телеканали хабар берди. Шунингдек, кўп ўтмай Yenisafakда ҳам воқеалар ривожи борасида хабарлар пайдо бўлди. Нашр дастлаб портлаш натижасида жароҳатланганлар сони 11 нафар эканлигини айтган. Лекин Истанбул ҳокими Aли Ерликая аввалига ўзининг Твиттердаги саҳифасида Истиқлол кўчасидаги портлаш оқибатида ҳалок бўлганлар борлигини, лекин қурбонлар сони ҳали аниқ эмаслигини ва бу борада текширувлар олиб борилаётганини билдирган. Кейинроқ эса у портлаш натижасида тўрт киши ҳалок бўлганини, жароҳатланганлар эса 38 нафарни ташкил қилаётганидан хабар берган. 

  ОАВларида бераётган маълумотлардан кўчадаги камераларда портлаш билан боғлиқ вазиятлар тасвири ёзиб олингани маълум бўлди.

  Yenisafak нашрининг сўнгги хабарларида Истанбул Бош прокуратураси Истиқлол кўчасидаги портлашни террорчилик ҳаракати сифатида квалификация қилгани кўрсатилган. Мамлакат президенти Эрдоған фожеавий воқеанинг тафсилатлари ҳақида сўзлаб, портлаш қурбонларининг сони 6 нафар, жароҳатланганлар сони 53 нафарга етганини ўз баёнотида маълум қилди.