Исроил аскарлари Иордания дипломатик миссияси раҳбарини Ал-Ақсо масжидига киришига рухсат бермагани учун Иордания Ташқи ишлар вазирлиги Исроил элчисини норозилик билдириш учун чақирди, деб ёзади араб матбуоти.
Қайд этилганидек, ишғолчи ҳокимият Иордания элчисини масжидга киритишга рухсат бермаган ва у бунга қарши норозилик билдира бошлаганидан кейин уни туртиб юборган. Полиция дипломатдан ташриф буюриш учун олдиндан рухсат олишни талаб қилган. Полиция Иордания вакилини дипломат эканлиги ва дипломатларнинг киришини Авқоф вазирлиги мувофиқлаштириши керак, деган баҳона билан масжидга киришига тўсқинлик қилган.
Сўнгги пайтларда Тел-Авив ва Аммон ўртасидаги муносабатлар Исроилнинг Қуддус ва Ал-Ақсо масжидидаги статус-квони ўзгартиришга уринишлари туфайли кескинлашган. Ҳошимийлар подшоҳлиги 1924 йилдан бери Қуддусдаги ёдгорликларнинг қўриқчиси бўлиб, уларни сақлаш харажатларини тўлаб келади.
