Касалликларнинг олдини олиш ва назорат қилиш бўйича Европа маркази, Жаҳон соғлиқни сақлаш ташкилоти ва Испания Соғлиқни сақлаш вазирлигининг фавқулодда вазиятларни мувофиқлаштириш маркази Испаниянинг Гвадалахара шаҳридаги паррандачилик фермасида ишлайдиган одамда парранда гриппи аниқланганини тасдиқлади.

Парранда гриппи Европада иккинчи марта, Испанияда эса биринчи марта одамларда кузатилгани билдирилди. Биринчи ҳолат Буюк Британияда 2021 йил декабрь ойида қайд этилганди. 

Испания Соғлиқни сақлаш вазирлиги расмийлари беморнинг вирусли кучи жуда паст бўлгани ва ҳеч қандай аломатлар йўқлигини таъкидламоқда. 

"H5N1" деб номланган қуш гриппи биринчи марта 1990-йилларнинг охирида Хитойда аниқланган ва 1997 йили Гонконгда мазкур вирус билан касалланган 18 кишидан 6 нафари вафот этган. Тадқиқотчилар бу вирус одамларга юқиши ва одамлар жиддий касалликларга дучор бўлиши мумкинлиги ҳақида огоҳлантирганди.

ЖССТ маълумотларига кўра, 2003 йилдан бери парранда гриппи ташхиси қўйилган 864 кишидан 456 нафари (52 фоиз) вафот этган.