Ироқ ҳукумати мамлакатдан ноқонуний олиб чиқиб кетилган 2.5 миллиард долларни қайтармоқчи. Бу ҳақда мамлакат бош вазири Муҳаммад ас-Судани маълум қилди.

“Ироқ БМТнинг Коррупцияга қарши конвенциясига қўшилган. Давлатлар бу ҳужжат доирасидаги мажбуриятига амал қилиши ва Ироқ билан ҳамкорлик қилиши зарур”, – деган у.

 Сиёсатчининг сўзларига кўра, Ироқда ўғирланган 3 триллион динордан ортиқ маблағнинг катта қисми мамлакатдан олиб чиқиб кетилган. Бундан олдин Ироқ молия вазирлиги 2021 йил сентябридан 2022 йил августигача Ироқнинг «Ар-Рафидейн» давлат банкидан 3.7 триллион ироқ динори миқдорида пул олиб кетилгани тўғрисида хабар берилганди. Пул ювиш операцияларида камида 5 компания иштирок этган. Республика суд органлари қатор шахсларнинг мол-мулкини мусодара қилиш ва қамоққа олишга буйруқ берди.