Ирландия шимоли-ғарбидаги ёқилғи қуйиш шохобчасида жума куни содир бўлган портлашда ўн киши, жумладан, икки ўсмир ва бир ёш бола ҳалок бўлди, дея хабар беради маҳаллий ҳукумат.

Ирландия полициясининг айтишича, Донеголдаги портлашда ҳалок бўлган 10 киши орасида тўрт эркак, уч аёл, бир ўсмир бола, бир ўсмир қиз ва бир ёш қизча бор. Аввалроқ полиция саккиз киши жабрланганини маълум қилган эди.

Портлаш жума куни маҳаллий вақт билан соат 15:00 дан кейин Донегол округида Крислоу қишлоғи чеккасидаги Applegreen ёқилғи қуйиш шохобчасида содир бўлган.

Полиция буни «фожиали бахтсиз ҳодиса» ва минтақада сўнгги ўн йилликлардаги энг кўп аҳоли қурбон бўлган воқеа эканини айтган.

Суперинтендант Девид Келли: “Бу бизнинг жамиятимиз учун фожиа. Вайронага айланган оилалар бор. Ўз номимдан ва воқеа жойида ҳозир бўлган ҳамкасбларим номидан самимий ҳамдардлигимизни билдирмоқчиман”, деб айтган.

Шанба куни эрталаб RТE миллий телерадиокомпаниясида Ирландия бош вазири Майкл Мартин ҳам қурбон бўлганларнинг оилаларига ҳамдардлик билдирди.