Бу глобал миқиёсда салбий таъсирга эга бўлиши мумкин.Индонезия 28 апрелдан пальма ёғи экспортига тақиқ қўйди. бу ҳақда мамлакат президенти Жоко Видодо маълум қилди.

Видодо ушбу қарорни мамлакат ички бозорини тўлдириш зарурати билан изоҳлаган. У кўрилаётган чоралар ижросини назорат қилишга ваъда берган.

Индонезия дунёдаги 50 фоиз пальма ёғини ишлаб чиқаради. Унинг экспорти тақиқланиши глобал бозорларга таъсирини ўтказмай қолмайди.  Экспертлар бу энг аввало ушбу маҳсулотнинг энг йирик импортёри бўлган Ҳиндистонга таъсир ўтказишидан огоҳлантирмоқда.

Бундан ташқари пальма ёғи бошқа маҳсулотлар ишлаб чиқарилишида катта ўрин эгаллайди.  Яқин ойлар ичида унинг бир тоннаси 1.93 минг долларга етиши кутилмоқда. Бу озиқ-овқат ва косметика товарлари нархининг ошишига ҳам олиб келади. Хусусан, Procter & Gamble, Nestle ва Unilever каби компаниялар пальма ёғининг асосий истеъмолчилари қаторига киради.

Шунингдек, пальма ёғининг муқобиллари нархи ҳам рекорд даражада ўсади. Масалан, ҳозирнинг ўзида соя мойи 4.5 фоизга қимматлашди. Бундан ташқари, Канада, Бразилия ва Аргентинадаги қурғоқчилик соя ҳамда рапс ёғи етиштирилишининг камайишига сабаб бўлди.

Айрим мутахассислар Малайзиянинг Индонезия ўрнини тўлдиришига умид билдирмоқда, аммо бунинг ҳам эҳтимоли кам. Чунки пандемия ортидан Малайзияда ишчи кучи етишмовчилиги кузатилмоқда.