Бугун, муҳаррам ойининг ўн саккизинчиси "Имомул-Ҳарамайн" лақабини олган Абул Маъолий Абдулмалик ибн Абдуллоҳ ибн Юсуф ал-Жувайний таваллуд топган кун.

Абул Маъолий Абдулмалик ибн Абдуллоҳ ибн Юсуф ал-Жувайний (1028-1085, Нишопур) — мусулмон ҳуқуқида шофийлик мазҳаби ва каломдаги ашъарийлик йўналиши вакили; Имомул-Ҳарамайн ва Ибн ал-Жувайний лақаблари билан ҳам танилган.

1028 йилда Нишопурдан унча узоқ бўлмаган Жувайн туманининг Азазвар қишлоғида туғилган. Тўлиқ исми Абул Маъолий Абдулмалик ибн Абдуллоҳ ибн Юсуф ал-Жувайний ан-Найсабурий аш-Шофеъийдир.

Нишопурда Абулқосим ал-Исфарайний (вафоти 1059 йил) раҳбарлигида калом ва усулуд динни, отасидан фиқҳ илмини ўрганган. Ал-Жувайний 1046 йилда отаси вафотидан кейин Абулқосим ал-Исфарайний устозлигида ўқишни давом эттирар экан, Шофеъий мадрасасида отасининг ўрнида мударрислик қилган. Салжуқийлар вазири ал-Кундурий томонидан уюштирилган ашъарийлар таъқиби пайтида у Ҳижозга қочиб Макка ва Мадинада яшаган (1058-1062), шу сабабли Имомул-Ҳарамайн (“икки муқаддас шаҳарнинг имоми”) лақабини олган.

Ашъарийлар таъқибини тўхтатган вазир Низомулмулк қўл остида Ал-Жувайний Нишопурга қайтиб келган эди. Ўша вақтда у ерда шофеъийларнинг “Низомийя” мадрасаси ташкил этилган эди. Ал-Жувайний Низомулмулкдан умрининг охиригача бу мадраса мудири лавозимини олди. Унинг “Низомийя”даги шогирдлари орасида Абу Ҳомид Ғаззолий ҳам бўлган.

Ёқуб Умар тайёрлади