Мазкур гуноҳлар сабабидан ҳозирги кунда турли азоблар содир бўлмоқда. Бир шаҳарни ер ютган, бир шаҳарда қаттиқ шамол, яна бирида қаҳатчилик бўлган, баъзи бир жойда сув йўқ, бошқа жойларда сув ҳаддан ошиб кетган, бир жой жуда совуқ бўлса, бошқасида иссиқ ҳаддан ошиб кетган. 

Баъзи бир жойда одамлар кўп ўлмоқда, яна баъзи бир жойда бўрон бўлмоқда, баъзи жойларга ўт кетяпти, баъзи жойларда қаттиқ шамол меваларни пишиб етилишидан олдин дарахтлардан тўкиб юбормоқда. Баъзи жойда султон золимлик қилмоқда, яна баъзи жойларда вабо тарқамоқда. 

Буларнинг барчасига бизнинг ғийбат сингари гуноҳларимиз сабабдир. Одамлар бу ишларнинг барчасидан тавба қилишлари лозим. Уларга ҳайронман, ёмғир ёғмай қолса ёки шиддатли шамол келса, қўрқиб дуога қўл кўтарадилар, бироқ азобга сабаб бўладиган ишлардан тийилмайдилар. 

Ибодат ва яхши ишлардан чарчасалар ҳам, ғийбат қилишдан чарчамайдилар. Шунинг учун қилган дуолари ҳам қабул бўлмайди. Гуноҳ қилавериб диллари қотиб кетгани сабабли ҳаргиз насиҳатни қабул қилмайдилар.

Гоҳида жаннат зикри бўлса, жаннатни сўраб дуо қилиб қўяверадилар, лекин унга киришга монелик қиладиган ишлардан парҳезлари йўқ. Маъруза қилувчининг насиҳатини эшитадилар-у, унинг ёнидан чиққач, яна ўз йўлларида (гуноҳ қилишда) давом этаверадилар.

Муҳаммад Абдулҳай Лакҳнавийдан Ёрқинжон домла Фозилов таржимаси