Сирдарё вилоятида қуввати 220 MVt бўлган янги иссиқлик электр станцияси ишга туширилди. Ушбу иншоот Туркиянинг Cengiz Energy компанияси томонидан қуриб битирилди.

Ушбу станциянинг барпо этилиши электр энергиясига бўлган эҳтиёжни қоплашда яна бир муҳим қадам бўлмоқда. Яқинда электростанциясининг илк станцияси синовдан ўтказилди. Станция қисқа муддат ичида Ўзбекистоннинг ягона электр тармоғига уланиб, қувват узатишни бошлади.  

– Лойиҳамизда 23 та двигателлар жойлашган. Бундан ташқари икки буғ трубиналари бўлиб, ҳозирги кунда монтаж ишларининг 95 фоизи якунланди, – дейди лойиҳа раҳбари Ражаб Мусаллам. – Охирги тест синовлари амалга ошириляпти. Бу ерда 500 нафар ишчи фаолият олиб бормоқда. 450 нафар ходим маҳаллий ишчилар  50 нафар туркиялик мутахассислар билан барча ишларни амалга оширди. Якунда 50 нафар ўзбекистонлик ишчи сараланиб, мазкур корхонада доимий иш билан таъминланади.  

Станция тўлиқ ишга туширилгач, қарийб 600 минг хонадонни электр энергияси билан тўлиқ таъминлайди. Яқин кунларда тўлиқ ишга туширилади. Электр станцияси йилига 1,7 миллиард киловатт соат электр энергияси ишлаб чиқариш имкониятига эга. Яна бир муҳим жиҳати, маҳаллий аҳолининг анчагина қисми доимий иш билан таъминланади. Электр энергияси иқтисодиётнинг муҳим қон томири. Унинг узлуксиз ишлаши ҳудудда ишлаб чиқаришнинг барқарор тараққиёти учун мустаҳкам замин бўлади.