Грузия парламенти шу ҳафта Тбилисида оммавий норозилик намойишлари ва полиция билан тўқнашувларга сабаб бўлган “чет эл агенти тўғрисидаги қонун” лойиҳасини» рад этди.

Иккинчи ўқишда «Чет эл таъсирининг шаффофлиги тўғрисида»ги қонун лойиҳасига 35 депутат овоз берди, фақат биттаси уни қўллаб-қувватлади. «Рустави 2» телеканалининг хабар беришича, сессияда жами 112 депутат қатнашган. Шундай қилиб, қолган депутатлар овоз беришдан воз кечди. Демак, қонун лойиҳаси рад этилган ва қабул қилинмайди.

7 март куни парламент қонун лойиҳасини биринчи ўқишда 76 депутат овози билан қабул қилинган эди. Ўша куни кечқурун ва эртасига Тбилисида оммавий норозилик намойишлари бўлиб ўтди. 9 март куни эрталаб ҳукмрон «Грузия орзуси» партияси ва парламентдаги кўпчилик «чет эл агентлари тўғрисида»ги қонун лойиҳасини «қайтариб олиш» ҳақида баёнот берди, мухолифат уни Россия қонунчилиги билан солиштирди.

«Биз кўриб турибмизки, [биринчи ўқишда] қабул қилинган қонун лойиҳаси жамиятда баҳс-мунозараларга сабаб бўлди. Ёлғон машинаси қонун лойиҳасини салбий кўринишда тақдим этиб, аҳолининг маълум бир қисмини чалғитишга муваффақ бўлди. Қонун лойиҳасига “Россияники" деган сохта ёрлиқ берилди. Қонун ва унинг биринчи ўқишда маъқулланиши жамоатчиликнинг бир қисми назарида Европа курсидан чекиниш сифатида баҳоланди”, — дейилади баёнотда.