Греция ҳуқуқ-тартибот идоралари Франция фуқароси томонидан содир этилган исломофобик ҳаракат жиноятини тергов қилмоқда.
Франциялик фуқаро Ғарбий Фракиядаги масжидлардан бирига келиб, диндорлар кўз ўнгида қўполлик қилиб Қуръони карим нусхаларини йиртиб ташлади, деб ёзади Islamnews нашри.
Воқеа гувоҳлари полицияга мурожаат қилган, қонунбузарлик қилган шахс қўлга олинган. Минтақа муфтийси ва Грециядаги турк жамияти етакчилари хорижлик фуқаронинг ҳаракатини кескин қоралади, бунга Греция Дин ишлари ва таълим вазирлиги ҳам қўшилган.
“Ҳар бир диний жамоанинг зиёратгоҳларини ҳурмат қилиш Греция учун баҳс этиб бўлмайдиган қадриятдир”, — деган вазирлик.
Эслатиб ўтамиз, Ғарбий Фракияда 150 мингга яқин турк миллатига мансуб мусулмонлар истиқомат қилади.
